ba-har-unvāñ mohabbat ko bahār-e-zindagī kahiye
qarīn-e-maslahat hai us ke har ġham ko ḳhushī kahiye

jahāñ-sāzoñ ko farzāna ham ahl-e-dil ko dīvāna
zamāna to bahut kahtā rahā ab aap bhī kahiye

ba-unvān-e-digar phir ham se qaa.em kar liyā tum ne
vo ik gahrā ta.alluq jis ko tark-e-dostī kahiye

samajh kar sañg-e-rāh-e-shauq Thukrātā huuñ manzil ko
kamāl-e-āgahī kahiye ise yā gumrahī kahiye

shab-e-mahtāb meñ akasr fazāoñ se barastā hai
tilism-e-naġhmagī aisā ki jis ko ḳhāmushī kahiye

maiñ akasr sochtā huuñ terī be-pāyāñ navāzish ko
adā-e-ḳhās kahiye koī yā bas sādgī kahiye

bharī mahfil se bhī tishna hī lauT aa.ī nazar apnī
ḳhud-āgāhī samajh liije ise yā ḳhud-sarī kahiye

ba-har-unwan mohabbat ko bahaar-e-zindagi kahiye
qarin-e-maslahat hai us ke har gham ko KHushi kahiye

jahan-sazon ko farzana hum ahl-e-dil ko diwana
zamana to bahut kahta raha ab aap bhi kahiye

ba-unwan-e-digar phir hum se qaem kar liya tum ne
wo ek gahra talluq jis ko tark-e-dosti kahiye

samajh kar sang-e-rah-e-shauq Thukraata hun manzil ko
kamal-e-agahi kahiye ise ya gumrahi kahiye

shab-e-mahtab mein akasr fazaon se barasta hai
tilism-e-naghmagi aisa ki jis ko KHamushi kahiye

main akasr sochta hun teri be-payan nawazish ko
ada-e-KHas kahiye koi ya bas sadgi kahiye

bhari mahfil se bhi tishna hi lauT aai nazar apni
KHud-agahi samajh lije ise ya KHud-sari kahiye

Source: Book : Nuskha Hai Wafa (Pg. 164)