ba-zāhir yuuñ to maiñ simTā huā huuñ
agar socho to phir bikhrā huā huuñ

mujhe dekho tasavvur kī nazar se
tumhārī zaat meñ utrā huā huuñ

sunā de phir koī jhūTī kahānī
maiñ pichhlī raat kā jaagā huā huuñ

kabhī bahtā huā dariyā kabhī maiñ
sulagtī ret kā sahrā huā huuñ

jab apnī umr ke logoñ meñ baiThūñ
ye lagtā hai ki maiñ būḌhā huā huuñ

kahāñ le jā.egī 'tābish' na jaane
havā ke dosh par Thahrā huā huuñ

ba-zahir yun to main simTa hua hun
agar socho to phir bikhra hua hun

mujhe dekho tasawwur ki nazar se
tumhaari zat mein utra hua hun

suna de phir koi jhuTi kahani
main pichhli raat ka jaga hua hun

kabhi bahta hua dariya kabhi main
sulagti ret ka sahra hua hun

jab apni umr ke logon mein baiThun
ye lagta hai ki main buDha hua hun

kahan le jaegi 'tabish' na jaane
hawa ke dosh par Thahra hua hun