tire sulūk-e-taġhāful se ho ke saudā.ī
chalā huuñ maiñ to kuchh aage chalī hai rusvā.ī

nayā nayā hai abhī jazba-e-ḳhud-ārā.ī
ḳhudā kare ki na aa.e ḳhayāl-e-yaktā.ī

tabī.atoñ meñ baḌā iḳhtilāf hotā hai
mujhe to arz-e-tamannā pe sharm sī aa.ī

hayāt-e-ishq ke ye pech o ḳham nasheb o farāz
inhīñ kā naam hai shāyad kisī kī añgḌā.ī

jo aaj zikr chalā āstīñ ke sāñpoñ kā
to mujh ko apne ka.ī dostoñ kī yaad aa.ī

tumhārī yaad ko rah rah ke gher laatī hai
mah o nujūm kī tābish guloñ kī rānā.ī

talab kī maut samajhiye rah-e-talab meñ qayām
baḌā ġhalat hai taqāzā-e-ābla-pā.ī

tamām umr meñ pahuñchā huuñ is natīje par
nashāt-e-bazm se behtar hai dard-e-tanhā.ī

vo ibtidā-e-mohabbat kī guftugū 'mahshar'
bajā rahā ho koī duur jaise shahnā.ī

tere suluk-e-taghaful se ho ke saudai
chala hun main to kuchh aage chali hai ruswai

naya naya hai abhi jazba-e-KHud-arai
KHuda kare ki na aae KHayal-e-yaktai

tabiaton mein baDa iKHtilaf hota hai
mujhe to arz-e-tamanna pe sharm si aai

hayat-e-ishq ke ye pech o KHam nasheb o faraaz
inhin ka nam hai shayad kisi ki angDai

jo aaj zikr chala aastin ke sanpon ka
to mujh ko apne kai doston ki yaad aai

tumhaari yaad ko rah rah ke gher lati hai
mah o nujum ki tabish gulon ki ranai

talab ki maut samajhiye rah-e-talab mein qayam
baDa ghalat hai taqaza-e-abla-pai

tamam umr mein pahuncha hun is natije par
nashat-e-bazm se behtar hai dard-e-tanhai

wo ibtida-e-mohabbat ki guftugu 'mahshar'
baja raha ho koi dur jaise shahnai

RECITATIONS Fasih Akmal



00:00/00:00 tere suluk-e-taghaful se ho ke saudai Fasih Akmal