jab kabhī shor-e-jahāñ hotā hai
mere hone kā gumāñ hotā hai

jabr hai mujh pe nizām-e-fitrat
mujh pe har lamha girāñ hotā hai

subah hotī nahīñ pahle jaisī
shab-giraftār samāñ hotā hai

dhund meñ khote haiñ manzar saare
pech dar pech dhuāñ hotā hai

shaam tā-sub.h charāġhāñ kar ke
dasht meñ nauha-e-jāñ hotā hai

vaqt phailātā hai dāman apnā
aag kā dariyā ravāñ hotā hai

mujh ko āzād kar ai dānish-e-nau
dil giraftār-e-butāñ hotā hai

jab kabhi shor-e-jahan hota hai
mere hone ka guman hota hai

jabr hai mujh pe nizam-e-fitrat
mujh pe har lamha giran hota hai

subah hoti nahin pahle jaisi
shab-giraftar saman hota hai

dhund mein khote hain manzar sare
pech dar pech dhuan hota hai

sham ta-subh charaghan kar ke
dasht mein nauha-e-jaan hota hai

waqt phailata hai daman apna
aag ka dariya rawan hota hai

mujh ko aazad kar ai danish-e-nau
dil giraftar-e-butan hota hai