zindagī se thak ke us kūche meñ huuñ baiThā huā
jaise apne vaqt kā suufī baḌā pahuñchā huā

jis tarah bādal baras jaa.eñ nikhar jaane ke ba.ad
aaj aañsū bah ke dil kā bojh kuchh halkā huā

jaane kab se dhuup meñ pyāse paḌe the ḳhār-e-dasht
mere talvoñ kā sahārā mil gayā achchhā huā

shahr-e-be-ehsās meñ merī sadā-e-ehtijāj
tiir ho jaise añdhere meñ koī chhoḌā huā

tarz-e-istifsār kab hai merī bātoñ kā javāb
ye koī andāz hai phir kyā huā phir kyā huā

zindagī raqsāñ ho 'mahshar' jhuum uTThe kā.enāt
ḳhvāb se uTThā huuñ maiñ añgḌā.iyāñ letā huā

zindagi se thak ke us kuche mein hun baiTha hua
jaise apne waqt ka sufi baDa pahuncha hua

jis tarah baadal baras jaen nikhar jaane ke baad
aaj aansu bah ke dil ka bojh kuchh halka hua

jaane kab se dhup mein pyase paDe the KHar-e-dasht
mere talwon ka sahaara mil gaya achchha hua

shahr-e-be-ehsas mein meri sada-e-ehtijaj
tir ho jaise andhere mein koi chhoDa hua

tarz-e-istifsar kab hai meri baaton ka jawab
ye koi andaz hai phir kya hua phir kya hua

zindagi raqsan ho 'mahshar' jhum uTThe kaenat
KHwab se uTTha hun main angDaiyan leta hua

Source: Book : Sahbaa-o-Saman (Pg. 114) Edition : 1st 1979 IInd 2008