ulfat kā dard-e-ġham kā parastār kaun hai
duniyā meñ āñsuoñ kā talabgār kaun hai

ḳhushiyāñ chalā huuñ bāñTne aañsū sameT kar
uljhan hai mere sāmne haqdār kaun hai

zid par aḌe hue haiñ ye dil bhī dimāġh bhī
ab dekhnā hai in meñ asar-dār kaun hai

pahle talāsh kījiye manzil kī rahguzar
phir sochiye ki raah meñ dīvār kaun hai

kānoñ ko chhū ke guzrī hai koī sadā abhī
ye kaun aah bhartā hai bīmār kaun hai

is paar maiñ huuñ aur ye TuuTī huī sī naav
āvāz de rahā hai jo us paar kaun hai

ulfat ka dard-e-gham ka parastar kaun hai
duniya mein aansuon ka talabgar kaun hai

KHushiyan chala hun banTne aansu sameT kar
uljhan hai mere samne haqdar kaun hai

zid par aDe hue hain ye dil bhi dimagh bhi
ab dekhna hai in mein asar-dar kaun hai

pahle talash kijiye manzil ki rahguzar
phir sochiye ki rah mein diwar kaun hai

kanon ko chhu ke guzri hai koi sada abhi
ye kaun aah bharta hai bimar kaun hai

is par main hun aur ye TuTi hui si naw
aawaz de raha hai jo us par kaun hai

Source: