adab ne dil ke taqāze uThā.e haiñ kyā kyā
havas ne shauq ke pahlū dabā.e haiñ kyā kyā

na jaane sahv-e-qalam hai ki shāhkār-e-qalam
balā-e-husn ne fitne uThā.e haiñ kyā kyā

nigāh Daal dī jis par vo ho gayā andhā
nazar ne rañg-e-tasarruf dikhā.e haiñ kyā kyā

isī fareb ne maarā ki kal hai kitnī duur
is aaj kal meñ abas din gañvā.e haiñ kyā kyā

pahāḌ kāTne vaale zamīñ se haar ga.e
isī zamīn meñ dariyā samā.e haiñ kyā kyā

guzar ke aap se ham aap tak pahuñch to ga.e
magar ḳhabar bhī hai kuchh pher khaa.e haiñ kyā kyā

buland ho to khule tujh pe zor pastī kā
baḌe-baḌoñ ke qadam Dagmagā.e haiñ kyā kyā

ḳhushī meñ apne qadam chuum luuñ to zebā hai
vo laġhzishoñ pe mirī muskurā.e haiñ kyā kyā

ḳhudā hī jaane 'yagānā' maiñ kaun huuñ kyā huuñ
ḳhud apnī zaat pe shak dil meñ aa.e haiñ kyā kyā

adab ne dil ke taqaze uThae hain kya kya
hawas ne shauq ke pahlu dabae hain kya kya

na jaane sahw-e-qalam hai ki shahkar-e-qalam
bala-e-husn ne fitne uThae hain kya kya

nigah Dal di jis par wo ho gaya andha
nazar ne rang-e-tasarruf dikhae hain kya kya

isi fareb ne mara ki kal hai kitni dur
is aaj kal mein abas din ganwae hain kya kya

pahaD kaTne wale zamin se haar gae
isi zamin mein dariya samae hain kya kya

guzar ke aap se hum aap tak pahunch to gae
magar KHabar bhi hai kuchh pher khae hain kya kya

buland ho to khule tujh pe zor pasti ka
baDe-baDon ke qadam Dagmagae hain kya kya

KHushi mein apne qadam chum lun to zeba hai
wo laghzishon pe meri muskurae hain kya kya

KHuda hi jaane 'yagana' main kaun hun kya hun
KHud apni zat pe shak dil mein aae hain kya kya

Videos
This video is playing from YouTube Videos
This video is playing from YouTube Hamid Ali RECITATIONS Fasih Akmal



00:00/00:00 adab ne dil ke taqaze uThae hain kya kya Fasih Akmal