basta-lab thā vo magar saare badan se boltā thā
bhed gahre pāniyoñ ke chupke chupke kholtā thā
thā ajab kuchh sehr-sāmāñ ye bhī achraj ham ne dekhā
chhantā thā ḳhāk-e-sahrā aur motī roltā thā
rach rahā thā dhīre dhīre mujh meñ nashsha tīrgī kā
kaun thā jo mere paimāne meñ rāteñ gholtā thā
Dar ke maare log the dubke hue apne gharoñ meñ
ek bādal sā dhueñ kā bastī bastī Doltā thā
kaañp kaañp uThtā thā merā maiñ hī ḳhud mere muqābil
maiñ nahīñ to phir vo kis par kaun ḳhanjar taultā thā
basta-lab tha wo magar sare badan se bolta tha
bhed gahre paniyon ke chupke chupke kholta tha
tha ajab kuchh sehr-saman ye bhi achraj hum ne dekha
chhanta tha KHak-e-sahra aur moti rolta tha
rach raha tha dhire dhire mujh mein nashsha tirgi ka
kaun tha jo mere paimane mein raaten gholta tha
Dar ke mare log the dubke hue apne gharon mein
ek baadal sa dhuen ka basti basti Dolta tha
kanp kanp uThta tha mera main hi KHud mere muqabil
main nahin to phir wo kis par kaun KHanjar taulta tha
Leave a comment