Subscribe to our newsletter and get our newest updates

Mahmood Shaam

  • Ghazal


kitne dar wa hain kahin aankh milaen to sahi


kitne dar vā haiñ kahīñ aañkh milā.eñ to sahī
is na.e shahr se kuchh rabt baḌhā.eñ to sahī

kisī ḳhushbū ke ta.āqub meñ chalīñ gām-do-gām
dhyān meñ chāñdnī kā shahr basā.eñ to sahī

kuchh to kahtī hai sar-e-shām samundar kī havā
kabhī sāhil kī ḳhunuk ret pe jaa.eñ to sahī

kyā ḳhabar oT meñ hoñ us kī manāzir kyā kyā
apne pindār kī dīvār girā.eñ to sahī

dil ke aurāq pe ab taaza hikāyāt likheñ
na.e lamhoñ meñ nayā ḳhuun rachāeñ to sahī

apne bikhre hue zarroñ ko sameTeñ phir se
bazm phir raqs-e-tamannā kī sajā.eñ to sahī

'shām' ye raushnī ye rañg ke phaile hue jaal
ik zarā un ke tilismāt meñ aa.eñ to sahī

kitne dar wa hain kahin aankh milaen to sahi
is nae shahr se kuchh rabt baDhaen to sahi

kisi KHushbu ke taaqub mein chalin gam-do-gam
dhyan mein chandni ka shahr basaen to sahi

kuchh to kahti hai sar-e-sham samundar ki hawa
kabhi sahil ki KHunuk ret pe jaen to sahi

kya KHabar oT mein hon us ki manazir kya kya
apne pindar ki diwar giraen to sahi

dil ke auraq pe ab taza hikayat likhen
nae lamhon mein naya KHun rachaen to sahi

apne bikhre hue zarron ko sameTen phir se
bazm phir raqs-e-tamanna ki sajaen to sahi

'sham' ye raushni ye rang ke phaile hue jal
ek zara un ke tilismat mein aaen to sahi


Leave a comment

+