Subscribe to our newsletter and get our newest updates

Vinod Kumar Tripathi Bashar

  • Ghazal


gila to un ko bhi hai main jinhen mila hi nahin


gila to un ko bhī hai maiñ jinheñ milā hī nahīñ
na jaane kitne fasānoñ meñ huuñ patā hī nahīñ

koī to pūchhe zarā haal un añdheroñ se
ki jin ke pahlū meñ sūraj kabhī ugā hī nahīñ

use hai aaj bhī rañj-o-malāl ye mujh se
ki dil pe us kī kisī baat ko liyā hī nahīñ

lo khel khel meñ banñe ko ban ga.ī kashtī
magar mizāj samundar kā kuchh patā hī nahīñ

vo shor kis kā thā shab bhar ki niiñd TuuT ga.ī
mire sivā to koī aur ghar meñ thā hī nahīñ

huā yuuñ karte haiñ tūfāñ se log ḳhauf-zada
ki jaise us ke thapeḌoñ meñ kuchh mazā hī nahīñ

ye nūr-e-sub.h hai āġhāz sirf ik din kā
vo din jo shaam guzarte kabhī rahā hī nahīñ

abhī se kar na muqarrar tū merā vaqt-e-hisāb
ki zindagī tujhe maiñ ne abhī jiyā hī nahīñ

ḳhalish jahāñ kī numāyāñ haiñ merī ġhazloñ meñ
vo dard bhī hai mirā jo mujhe milā hī nahīñ

gila to un ko bhi hai main jinhen mila hi nahin
na jaane kitne fasanon mein hun pata hi nahin

koi to puchhe zara haal un andheron se
ki jin ke pahlu mein suraj kabhi uga hi nahin

use hai aaj bhi ranj-o-malal ye mujh se
ki dil pe us ki kisi baat ko liya hi nahin

lo khel khel mein banne ko ban gai kashti
magar mizaj samundar ka kuchh pata hi nahin

wo shor kis ka tha shab bhar ki nind TuT gai
mere siwa to koi aur ghar mein tha hi nahin

hua yun karte hain tufan se log KHauf-zada
ki jaise us ke thapeDon mein kuchh maza hi nahin

ye nur-e-subh hai aaghaz sirf ek din ka
wo din jo sham guzarte kabhi raha hi nahin

abhi se kar na muqarrar tu mera waqt-e-hisab
ki zindagi tujhe main ne abhi jiya hi nahin

KHalish jahan ki numayan hain meri ghazlon mein
wo dard bhi hai mera jo mujhe mila hi nahin


Source: Rooh-e-Ghazal,Pachas Sala Intekhab

Leave a comment

+