Subscribe to our newsletter and get our newest updates

Faiz ul Hasan Khayal

  • Ghazal


dil jis ka dard-e-ishq ka hamil nahin raha


dil jis kā dard-e-ishq kā hāmil nahīñ rahā
vo shaḳhs tere pyaar ke qābil nahīñ rahā

jab bhī hinā.ī hāthoñ se gesū sañvar ga.e
ā.īna-e-bahār muqābil nahīñ rahā

har āstāñ se lauT ke aanā paḌā use
jo tere dar pe aane ke qābil nahīñ rahā

mahrūmiyāñ hī jis kā muqaddar haiñ dosto
vo mahfil-e-nashāt ke qābil nahīñ rahā

jab tum na the to kuchh bhī nahīñ thā bahār meñ
tum aa ga.e to koī muqābil nahīñ rahā

dīvāne tere Duub ga.e gahrī niiñd meñ
zindāñ meñ shor-e-tauq-o-salāsil nahīñ rahā

jab aap muskurā.e ġham-e-dil kī baat par
dil dard ko chhupāne ke qābil nahīñ rahā

tanhā.iyoñ kī bazm hī achchhī rahī 'ḳhayāl'
mahfil meñ pur-sukūn kabhī dil nahīñ rahā

dil jis ka dard-e-ishq ka hamil nahin raha
wo shaKHs tere pyar ke qabil nahin raha

jab bhi hinai hathon se gesu sanwar gae
aaina-e-bahaar muqabil nahin raha

har aastan se lauT ke aana paDa use
jo tere dar pe aane ke qabil nahin raha

mahrumiyan hi jis ka muqaddar hain dosto
wo mahfil-e-nashat ke qabil nahin raha

jab tum na the to kuchh bhi nahin tha bahaar mein
tum aa gae to koi muqabil nahin raha

diwane tere Dub gae gahri nind mein
zindan mein shor-e-tauq-o-salasil nahin raha

jab aap muskurae gham-e-dil ki baat par
dil dard ko chhupane ke qabil nahin raha

tanhaiyon ki bazm hi achchhi rahi 'KHayal'
mahfil mein pur-sukun kabhi dil nahin raha


Source: Book : Monthly Usloob (Pg. 370) Author : Mushfiq Khawaja Publication : Usloob 3D 9—26 Nazimabad karachi   180007 (Oct. õ Nov. 1983,Issue No. 5-6) Edition : Oct. õ Nov. 1983,Issue No. 5-6

Leave a comment

+