Subscribe to our newsletter and get our newest updates

Yasin Ali Khan Markaz

  • Ghazal


DhunDh hum un ko pareshan bane baiThe hain


DhūñDh ham un ko pareshān bane baiThe haiñ
vo to parda liye insān bane baiThe haiñ

zauq hāsil unheñ hotā hai har yak sūrat se
rañg-o-be-rañgī se har aan bane baiThe haiñ

chhoḌ masjid ko ga.e dair meñ puujā karne
the musalmān vo rahbān bane baiThe haiñ

baat ye hai ki hayūlā se hai sūrat paidā
har yak ajsām meñ rahmān bane baiThe haiñ

taaza har aan dikhāte haiñ vo jalva apnā
har ta.ayyun ke liye shaan bane baiThe haiñ

haiñ masīhā kahīñ bīmār kahīñ dard kahīñ
har tarah se vahī darmān bane baiThe haiñ
vahī hotā hai har yak kaam jo vo chāhte haiñ
dete hasrat bhī haiñ armān bane baiThe haiñ

kufr-o-islām ke parde se haiñ har haal meñ ḳhush
vājib ā.īna se imkān bane baiThe haiñ

sach to ye hai ki haqīqat jo hai un kī ma.alūm
jānte jo haiñ vo anjān bane baiThe haiñ

jumla advār o shayūnāt se jalva karte
shān-e-'markaz' meñ vo sub.hān bane baiThe haiñ

DhunDh hum un ko pareshan bane baiThe hain
wo to parda liye insan bane baiThe hain

zauq hasil unhen hota hai har yak surat se
rang-o-be-rangi se har aan bane baiThe hain

chhoD masjid ko gae dair mein puja karne
the musalman wo rahban bane baiThe hain

baat ye hai ki hayula se hai surat paida
har yak ajsam mein rahman bane baiThe hain

taza har aan dikhate hain wo jalwa apna
har tayyun ke liye shan bane baiThe hain

hain masiha kahin bimar kahin dard kahin
har tarah se wahi darman bane baiThe hain
wahi hota hai har yak kaam jo wo chahte hain
dete hasrat bhi hain arman bane baiThe hain

kufr-o-islam ke parde se hain har haal mein KHush
wajib aaina se imkan bane baiThe hain

sach to ye hai ki haqiqat jo hai un ki malum
jaante jo hain wo anjaan bane baiThe hain

jumla adwar o shayunat se jalwa karte
shan-e-'markaz' mein wo subhan bane baiThe hain


Source: Saamaan-e-Sar-Khushi

Leave a comment

+