na sahn-o-bām na dīvār-o-dar purāne haiñ
agar makīñ haiñ purāne to ghar purāne haiñ

saḳhāvatoñ hī ke dam se hai tāzgī kā bharam
samar na deñ to yaqīnan shajar purāne haiñ

dil aisī sūrat-e-ta.amīr par jame kab tak
tamām naqsh hī dīvār par purāne haiñ

havā kī lahr hai ab jis tarah bhī shohrat de
junūñ purānā na āshufta-sar purāne haiñ

qabāhateñ to yahīñ haiñ masāfatoñ meñ mirī
safar nayā hai sharīk-e-safar purāne haiñ

maiñ nā-balad huuñ rafū kī rivāyatoñ se to phir
nikalte kyuuñ nahīñ jo baḳhiya-gar purāne haiñ

ye rabt-e-ḳhair nishāñ hai saf-e-hunar ke liye
jo kuchh na.e haiñ to kuchh dīda-var purāne haiñ

sabhī ḳharābe haiñ dosh-e-zamīñ pe baar magar
ziyāda bojh vo haiñ jo khañDar purāne haiñ

na sahn-o-baam na diwar-o-dar purane hain
agar makin hain purane to ghar purane hain

saKHawaton hi ke dam se hai tazgi ka bharam
samar na den to yaqinan shajar purane hain

dil aisi surat-e-tamir par jame kab tak
tamam naqsh hi diwar par purane hain

hawa ki lahr hai ab jis tarah bhi shohrat de
junun purana na aashufta-sar purane hain

qabahaten to yahin hain masafaton mein meri
safar naya hai sharik-e-safar purane hain

main na-balad hun rafu ki riwayaton se to phir
nikalte kyun nahin jo baKHiya-gar purane hain

ye rabt-e-KHair nishan hai saf-e-hunar ke liye
jo kuchh nae hain to kuchh dida-war purane hain

sabhi KHarabe hain dosh-e-zamin pe bar magar
ziyaada bojh wo hain jo khanDar purane hain

Source: Book : Pakistani Adab (Pg. 664) Author : Dr. Rashid Amjad Publication : Pakistan Academy of Letters, Islambad, Pakistan (2009) Edition : 2009