Subscribe to our newsletter and get our newest updates

Aasi Ramnagri

  • Ghazal


di gai tartib-e-bazm-e-kun-fakan mere liye


dī ga.ī tartīb-e-bazm-e-kun-fakāñ mere liye
ye zamīñ mere liye hai āsmāñ mere liye

dīdanī hai ḳhud hī apne dil ke zaḳhmoñ kī bahār
hech hai rañgīnī-e-har-gulsitāñ mere liye

zauq-e-sajda chāhiye kaisā haram kaisī kunisht
āstān-e-dost hai har āstāñ mere liye

jāda-e-mehr-o-vafā meñ mar ke zinda ho gayā
maut hai merī hayāt-e-jāvidāñ mere liye

azm-e-kāmil ko mire har-gām par manzil milī
ban ga.iiñ dushvāriyāñ āsāniyāñ mere liye

ho mubārak hazrat-e-zāhid ko firdaus-e-jināñ
hai dayār-e-dost ḳhuld-e-jāvedāñ mere liye

ham-navāoñ ko mubārak halqa-e-zulf-e-butāñ
muztarib zindāñ meñ hoñgī beḌiyāñ mere liye

di gai tartib-e-bazm-e-kun-fakan mere liye
ye zamin mere liye hai aasman mere liye

didani hai KHud hi apne dil ke zaKHmon ki bahaar
hech hai rangini-e-har-gulsitan mere liye

zauq-e-sajda chahiye kaisa haram kaisi kunisht
aastan-e-dost hai har aastan mere liye

jada-e-mehr-o-wafa mein mar ke zinda ho gaya
maut hai meri hayat-e-jawidan mere liye

azm-e-kaamil ko mere har-gam par manzil mili
ban gain dushwariyan aasaniyan mere liye

ho mubarak hazrat-e-zahid ko firdaus-e-jinan
hai dayar-e-dost KHuld-e-jawedan mere liye

ham-nawaon ko mubarak halqa-e-zulf-e-butan
muztarib zindan mein hongi beDiyan mere liye


Pachas Sala Intekhab"

Leave a comment

+