Subscribe to our newsletter and get our newest updates

Zahid Chaudhry

  • Ghazal


chala hun ghar se main ahwal-e-dil sunane ko


chalā huuñ ghar se maiñ ahvāl-e-dil sunāne ko
vo muntazir haiñ mirā zabt āzmāne ko

raqīb saath hai aur zer-e-lab tabassum hai
ajab tarah se vo aayā hai dil dukhāne ko

agarche bazm-e-tarab meñ havas kā ġhalba hai
maiñ aa gayā huuñ mohabbat ke giit gaane ko

maiñ jā rahā huuñ vahāñ jabki az-rahe-tafrīh
sajī hai bazm mirā shauq āzmāne ko

ravish ravish meñ hai afsurdagī kī afzā.ish
vo phir bhī nikle haiñ tafrīh-e-gul manāne ko

junūn-e-ishq mirā jabki ik haqīqat hai
alag karūñgā maiñ is ishq se fasāne ko

maiñ chāhtā thā mirā ishq ek raaz rahe
vo aa gayā to ḳhabar ho ga.ī zamāne ko

vo jin se mujh ko tavaqqo thī pāsbānī kī
vo aa ga.e haiñ mirā āshiyāñ jalāne ko

janāb-e-shaiḳh kī ye vo ruḳhī ma.āz-allāh
huī hai shab to chale haiñ sharāb-ḳhāne ko

rah-e-hayāt meñ bahrūpiyoñ se vāqif huuñ
jo ġham-gusār bane merā dil dukhāne ko

jo be-ḳhabar haiñ sarāpā vo phir rahe haiñ aaj
qadam qadam pe na.ī dāstāñ sunāne ko

jidhar nigāh uThāo ravāñ hai ḳhūn-e-jigar
ḳhabar nahīñ ki ye kyā ho gayā zamāne ko

chala hun ghar se main ahwal-e-dil sunane ko
wo muntazir hain mera zabt aazmane ko

raqib sath hai aur zer-e-lab tabassum hai
ajab tarah se wo aaya hai dil dukhane ko

agarche bazm-e-tarab mein hawas ka ghalba hai
main aa gaya hun mohabbat ke git gane ko

main ja raha hun wahan jabki az-rahe-tafrih
saji hai bazm mera shauq aazmane ko

rawish rawish mein hai afsurdagi ki afzaish
wo phir bhi nikle hain tafrih-e-gul manane ko

junun-e-ishq mera jabki ek haqiqat hai
alag karunga main is ishq se fasane ko

main chahta tha mera ishq ek raaz rahe
wo aa gaya to KHabar ho gai zamane ko

wo jin se mujh ko tawaqqo thi pasbani ki
wo aa gae hain mera aashiyan jalane ko

janab-e-shaiKH ki ye wo ruKHi maaz-allah
hui hai shab to chale hain sharab-KHane ko

rah-e-hayat mein bahrupiyon se waqif hun
jo gham-gusar bane mera dil dukhane ko

jo be-KHabar hain sarapa wo phir rahe hain aaj
qadam qadam pe nai dastan sunane ko

jidhar nigah uThao rawan hai KHun-e-jigar
KHabar nahin ki ye kya ho gaya zamane ko


Leave a comment

+