Subscribe to our newsletter and get our newest updates

Mahir Bilgrami

  • Ghazal


tere diwane ne diwar mein dar khola hai


tere dīvāne ne dīvār meñ dar kholā hai
sar-e-aflāk nayā bāb-e-qamar kholā hai

Dhal gayā din bhī vahīñ raat ne Derā Daalā
thak ke rahrav ne jahāñ raḳht-e-safar kholā hai

mere chup rahne pe bhī baat vahāñ tak pahuñchī
rāz-e-dil tū ne magar dīda-e-tar kholā hai

ham kabhī tah se samundar ke haiñ motī laa.e
kabhī parcham sar-e-mah sīna-sipar kholā hai

dar-e-shabnam mah-o-anjum haiñ kabhī jalva-farosh
kis ne ganjīna ye har shām-o-sahar kholā hai

kohkan ban ke kabhī ham ne ba-rañg-e-majnūñ
ishq kā baab ba-andāz-e-digar kholā hai

hasad-o-hirs-o-havas aise ka.ī chor mile
maiñ ne chup-chāp kabhī apnā jo ghar kholā hai

saikḌoñ ḳhvāhishoñ kī nāgineñ Dasne ko baḌhīñ
ham ne jab bhī dar-e-ganjīna-e-zar kholā hai

jis ko dekho vahī vārafta-e-manzil hai yahāñ
vaah kyā maktaba-e-fikr-o-nazar kholā hai

kis ko fursat jo sune terī kahānī 'māhir'
daftar ik shikvoñ kā ye tū ne magar kholā hai

tere diwane ne diwar mein dar khola hai
sar-e-aflak naya bab-e-qamar khola hai

Dhal gaya din bhi wahin raat ne Dera Dala
thak ke rahraw ne jahan raKHt-e-safar khola hai

mere chup rahne pe bhi baat wahan tak pahunchi
raaz-e-dil tu ne magar dida-e-tar khola hai

hum kabhi tah se samundar ke hain moti lae
kabhi parcham sar-e-mah sina-sipar khola hai

dar-e-shabnam mah-o-anjum hain kabhi jalwa-farosh
kis ne ganjina ye har sham-o-sahar khola hai

kohkan ban ke kabhi hum ne ba-rang-e-majnun
ishq ka bab ba-andaz-e-digar khola hai

hasad-o-hirs-o-hawas aise kai chor mile
main ne chup-chap kabhi apna jo ghar khola hai

saikDon KHwahishon ki naginen Dasne ko baDhin
hum ne jab bhi dar-e-ganjina-e-zar khola hai

jis ko dekho wahi warafta-e-manzil hai yahan
wah kya maktaba-e-fikr-o-nazar khola hai

kis ko fursat jo sune teri kahani 'mahir'
daftar ek shikwon ka ye tu ne magar khola hai


Leave a comment

+