Subscribe to our newsletter and get our newest updates

Etibar Sajid

  • Ghazal


tilism-zar-e-shab-e-mah mein guzar jae


tilism-zār-e-shab-e-māh meñ guzar jaa.e
ab itnī raat ga.e kaun apne ghar jaa.e

ajab nasha hai tire qurb meñ ki jī chāhe
ye zindagī tirī āġhosh meñ guzar jaa.e

maiñ tere jism meñ kuchh is tarah samā jā.ūñ
ki terā lams mirī ruuh meñ utar jaa.e

misāl-e-barg-e-ḳhizāñ hai havā kī zad pe ye dil
na jaane shāḳh se bichhḌe to phir kidhar jaa.e

maiñ yuuñ udaas huuñ imshab ki jaise rañg-e-gulāb
ḳhizāñ kī chaap se be-sāḳhta utar jaa.e

havā-e-shām-e-judā.ī hai aur ġham lāhaq
na jaane jism kī dīvār kab bikhar jaa.e

agar na shab kā safar ho tire husūl kī shart
faroġh-e-mahr tirā e'tibār mar jaa.e

tilism-zar-e-shab-e-mah mein guzar jae
ab itni raat gae kaun apne ghar jae

ajab nasha hai tere qurb mein ki ji chahe
ye zindagi teri aaghosh mein guzar jae

main tere jism mein kuchh is tarah sama jaun
ki tera lams meri ruh mein utar jae

misal-e-barg-e-KHizan hai hawa ki zad pe ye dil
na jaane shaKH se bichhDe to phir kidhar jae

main yun udas hun imshab ki jaise rang-e-gulab
KHizan ki chap se be-saKHta utar jae

hawa-e-sham-e-judai hai aur gham lahaq
na jaane jism ki diwar kab bikhar jae

agar na shab ka safar ho tere husul ki shart
farogh-e-mahr tera e'tibar mar jae


Source: Funoon(Jadeed Ghazal Number: Volume-002)

Leave a comment

+