lahū ne kyā tire ḳhanjar ko dilkashī dī hai
ki ham ne zaḳhm bhī khaa.e haiñ daad bhī dī hai

libās chhīn liyā hai barahnagī dī hai
magar mazāq to dekho ki aañkh bhī dī hai

hamārī baat pe kis ko yaqīn aa.egā
ḳhizāñ meñ ham ne bashārat bahār kī dī hai

dharā hī kyā thā tire shahr-e-be-zamīr ke paas
mire shu.ūr ne ḳhairāt-e-āgahī dī hai

hayāt tujh ko ḳhudā aur sar-buland kare
tirī baqā ke liye ham ne zindagī dī hai

kahāñ thī pahle ye bāzār-e-sañg kī raunaq
sar-e-shikasta ne kaisī hamāhamī dī hai

charāġh huuñ mirī kirnoñ kā qarz hai sab par
ba-qadr-e-zarf nazar sab ko raushnī dī hai

chalī na phir kisī mazlūm ke gale pe chhurī
hamārī maut ne kitnoñ ko zindagī dī hai

tire nisāb meñ dāḳhil thī āstāñ-bosī
mire zamīr ne ta.alīm-e-sarkashī dī hai

kaTegī umr safar jāda-e-āfrīnī meñ
tirī talāsh ne taufīq-e-gumrahī dī hai

hazār dīda-tasavvur hazār rañg-e-nazar
havas ne husn ko bisyār chehragī dī hai

lahu ne kya tere KHanjar ko dilkashi di hai
ki hum ne zaKHm bhi khae hain dad bhi di hai

libas chhin liya hai barahnagi di hai
magar mazaq to dekho ki aankh bhi di hai

hamari baat pe kis ko yaqin aaega
KHizan mein hum ne bashaarat bahaar ki di hai

dhara hi kya tha tere shahr-e-be-zamir ke pas
mere shuur ne KHairaat-e-agahi di hai

hayat tujh ko KHuda aur sar-buland kare
teri baqa ke liye hum ne zindagi di hai

kahan thi pahle ye bazar-e-sang ki raunaq
sar-e-shikasta ne kaisi hamahami di hai

charagh hun meri kirnon ka qarz hai sab par
ba-qadr-e-zarf nazar sab ko raushni di hai

chali na phir kisi mazlum ke gale pe chhuri
hamari maut ne kitnon ko zindagi di hai

tere nisab mein daKHil thi aastan-bosi
mere zamir ne talim-e-sarkashi di hai

kaTegi umr safar jada-e-afrini mein
teri talash ne taufiq-e-gumrahi di hai

hazar dida-tasawwur hazar rang-e-nazar
hawas ne husn ko bisyar chehragi di hai

Source: Book : Karwaan-e-Ghazal (Pg. 310) Author : Farooq Argali Publication : Farid Book Depot (Pvt.) Ltd (2004) Edition : 2004