lab-e-talab bhī na phir mā.il-e-savāl huā
ki jab taqaddus-e-kashkol pā.emāl huā

ajiib qaht-e-ḳhayāl-o-ḳhabar se guzre ham
kisī ne haal bhī pūchā to jī bahāl huā

mile ba-sa.ī-e-rafū aur uThe garebāñ-chāk
ye mashvara huā logo ki ishti.āl huā

vo jaal phaile havā meñ ki par-kushāoñ ko
nashemanoñ kī taraf lauTnā muhāl huā

ye hashr us kā hai sūraj kahā gayā jis ko
kabhī sunā kisī zarre ko bhī zavāl huā

kuchh aise hādse bhī the jo zaḳhm-e-vaqt ke the
so kis se vaqt ke zaḳhmoñ kā indimāl huā

ajab vo shahr-e-sitamgar thā chhoḌ kar jis ko
bahut ḳhushī huī aur phir bahut malāl huā

vo ik musāfir-e-haq-kosh thā so us kā ye ajr
sadāqatoñ ke safar hī meñ intiqāl huā

phirīñ kuchh aisī shab-afroziyāñ nigāhoñ meñ
charāġh-e-shām jalā aur maiñ niDhāl huā

lab-e-talab bhi na phir mail-e-sawal hua
ki jab taqaddus-e-kashkol paemal hua

ajib qaht-e-KHayal-o-KHabar se guzre hum
kisi ne haal bhi pucha to ji bahaal hua

mile ba-sai-e-rafu aur uThe gareban-chaak
ye mashwara hua logo ki ishtial hua

wo jal phaile hawa mein ki par-kushaon ko
nashemanon ki taraf lauTna muhaal hua

ye hashr us ka hai suraj kaha gaya jis ko
kabhi suna kisi zarre ko bhi zawal hua

kuchh aise hadse bhi the jo zaKHm-e-waqt ke the
so kis se waqt ke zaKHmon ka indimal hua

ajab wo shahr-e-sitamgar tha chhoD kar jis ko
bahut KHushi hui aur phir bahut malal hua

wo ek musafir-e-haq-kosh tha so us ka ye ajr
sadaqaton ke safar hi mein intiqal hua

phirin kuchh aisi shab-afroziyan nigahon mein
charagh-e-sham jala aur main niDhaal hua

Videos
This video is playing from YouTube Videos
This video is playing from YouTube Mahshar Badayuni

Source: Book : Kulliyat-e-Mahshar Badayuni (Pg. 701)