Subscribe to our newsletter and get our newest updates

Jameela Khuda Bakhsh

  • Ghazal


kahan le jaegi dekhun ye meri aarzu mujhko


kahāñ le jā.egī dekhūñ ye merī aarzū mujh ko
liye phirtī hai har jānib tumhārī justujū mujh ko

bar aatī aarzū muddat pe mujh bargashta-kismat kī
bulāte apnī mahfil meñ agar tum rū-ba-rū mujh ko

mohabbat aisī shai hai jis se baaz aa.e koī āshiq
pasand aatī nahīñ nāseh tumhārī guftugū mujh ko

taḌap kar jism-e-ḳhākī se nikal jaatī ye jaañ apnī
na samjhātī shab-e-furqat jo terī aarzū mujh ko

mohabbat meñ kisī gul ke jalā jaatā hai dil apnā
'jamīla' misl-e-shabnam ho ga.ī rone kī ḳhū mujh ko

kahan le jaegi dekhun ye meri aarzu mujh ko
liye phirti hai har jaanib tumhaari justuju mujh ko

bar aati aarzu muddat pe mujh bargashta-kismat ki
bulate apni mahfil mein agar tum ru-ba-ru mujh ko

mohabbat aisi shai hai jis se baz aae koi aashiq
pasand aati nahin naseh tumhaari guftugu mujh ko

taDap kar jism-e-KHaki se nikal jati ye jaan apni
na samjhati shab-e-furqat jo teri aarzu mujh ko

mohabbat mein kisi gul ke jala jata hai dil apna
'jamila' misl-e-shabnam ho gai rone ki KHu mujh ko


Leave a comment

+