zindagī bhar ham lab-e-dariyā rahe
aur sarāboñ kī tarah tishna rahe

mirī tārīkī se ghar kyuuñ ho siyāh
āñkheñ bujh jaa.eñ diyā jaltā rahe

ban ga.e har ahd ke dil kī umañg
zinda log is tarah bhī zinda rahe

zulm dekho qasr-e-ishrat ham banā.eñ
aur hamīñ par band darvāza rahe

jāgtī āñkhoñ se kyā aa.e nazar
aadmī kā zehn agar soyā rahe

'mahshar' is tāroñ kī duniyā meñ mudām
chāñd kī mānind ham tanhā rahe

zindagi bhar hum lab-e-dariya rahe
aur sarabon ki tarah tishna rahe

meri tariki se ghar kyun ho siyah
aankhen bujh jaen diya jalta rahe

ban gae har ahd ke dil ki umang
zinda log is tarah bhi zinda rahe

zulm dekho qasr-e-ishrat hum banaen
aur hamin par band darwaza rahe

jagti aankhon se kya aae nazar
aadmi ka zehn agar soya rahe

'mahshar' is taron ki duniya mein mudam
chand ki manind hum tanha rahe

Source: Book : Kulliyat-e-Mahshar Badayuni (Pg. 312)