paan kī surḳhī nahīñ lab par but-e-ḳhūñ-ḳhvār ke
lag gayā hai ḳhūn-e-āshiq muñh ko is talvār ke

ḳhāl-e-āriz dekh lo halqe meñ zulf-e-yār ke
mār-e-mohra gar na dekhā ho dahan meñ maar ke

anjum-e-tābāñ falak par jāntī hai jis ko ḳhalq
kuchh sharāre haiñ vo merī āh-e-ātish-bār ke

tūba-e-jannat se us ko kaam kyā hai hūr-vash
jo ki haiñ āsūda saa.e meñ tirī dīvār ke

pūchhte ho haal kyā merā qimār-e-ishq meñ
jhaaḌ baiThā haath maiñ naqd-e-dil-o-dīñ haar ke

ye huī tāsīr ishq-e-koh-kan se sañg-e-āb
ashk jaarī ab talak chashmoñ se haiñ kohsār ke

hai vo be-vahdat ki jo samjhe hai kufr o diiñ meñ farq
rakhtī hai tasbīh rishta taar se zunnār ke

vāda-e-dīdār jo Thahrā qayāmat par to yaañ
roz hotī hai qayāmat shauq meñ dīdār ke

hoshiyārī hai yahī kiije 'zafar' is se hazar
dekhiye jis ko nashe meñ bāda-e-pindār ke

pan ki surKHi nahin lab par but-e-KHun-KHwar ke
lag gaya hai KHun-e-ashiq munh ko is talwar ke

KHal-e-ariz dekh lo halqe mein zulf-e-yar ke
mar-e-mohra gar na dekha ho dahan mein mar ke

anjum-e-taban falak par jaanti hai jis ko KHalq
kuchh sharare hain wo meri aah-e-atish-bar ke

tuba-e-jannat se us ko kaam kya hai hur-wash
jo ki hain aasuda sae mein teri diwar ke

puchhte ho haal kya mera qimar-e-ishq mein
jhaD baiTha hath main naqd-e-dil-o-din haar ke

ye hui tasir ishq-e-koh-kan se sang-e-ab
ashk jari ab talak chashmon se hain kohsar ke

hai wo be-wahdat ki jo samjhe hai kufr o din mein farq
rakhti hai tasbih rishta tar se zunnar ke

wada-e-didar jo Thahra qayamat par to yan
roz hoti hai qayamat shauq mein didar ke

hoshiyari hai yahi kije 'zafar' is se hazar
dekhiye jis ko nashe mein baada-e-pindar ke

Source: Book : Shab Charagh (Pg. 27) Author : Bakhtiyar Ziya Publication : Markaz-e-adab (1993) Edition : 1993