kabhī iqrār honā thā kabhī inkār honā thā
use kis kis tarah se dar-paye āzār honā thā

sunā ye thā bahut āsūda haiñ sāhil ke bāshinde
magar TuuTī huī kashtī meñ dariyā paar honā thā

sadā-e-al-amāñ dīvār-e-girya se palaT aa.ī
muqaddar kuufa o kābul kā jo mismār honā thā

muqaddar ke navishte meñ jo likkhā hai vahī hogā
ye mat socho ki kis par kis tarah se vaar honā thā

yahāñ ham ne kisī se dil lagāyā hī nahīñ 'manzar'
ki is duniyā se āḳhir ek din be-zār honā thā

kabhi iqrar hona tha kabhi inkar hona tha
use kis kis tarah se dar-paye aazar hona tha

suna ye tha bahut aasuda hain sahil ke bashinde
magar TuTi hui kashti mein dariya par hona tha

sada-e-al-aman diwar-e-girya se palaT aai
muqaddar kufa o kabul ka jo mismar hona tha

muqaddar ke nawishte mein jo likkha hai wahi hoga
ye mat socho ki kis par kis tarah se war hona tha

yahan hum ne kisi se dil lagaya hi nahin 'manzar'
ki is duniya se aaKHir ek din be-zar hona tha

RECITATIONS Umair Manzar



00:00/00:00 kabhi iqrar hona tha kabhi inkar hona tha Umair Manzar