kahīñ jamāl-e-azal ham ko rūnumā na milā
mile to husn magar husn aap sā na milā

rahī talāsh magar dard āshnā na milā
hamāre ba.ad unheñ ham sā bā-vafā na milā

ga.e haiñ dair-o-haram meñ bhī bārhā lekin
vo aasrā jo diyā tū ne sāqiyā na milā

jo duur the to bahut pārsā the ye zāhid
jo paas aa.e to koī bhī pārsā na milā

muqāble kī jo tāqat thī vo ubhar to sakī
ḳhudā kā shukr hai kashtī ko nāḳhudā na milā

javāb-e-jannat-e-rañgīñ sahī tirī duniyā
magar hameñ to yahāñ lutf ai ḳhudā na milā

havā-o-hirs ke lākhoñ shikār paa.e magar
koī bhī dard mohabbat meñ mubtalā na milā

jo chashm-e-mast se chhalkā ke de alast kī mai
tire sivā koī duniyā meñ sāqiyā na milā

mujhī ko baḳhsh diye kul jahān ke ālām
ġham-e-jahāñ ke liye koī dūsrā na milā

kahūñ to kis se kahūñ dil kī baat ai 'darshan'
sune jo dard-e-bashar aisā ham-navā na milā

kahin jamal-e-azal hum ko runuma na mila
mile to husn magar husn aap sa na mila

rahi talash magar dard aashna na mila
hamare baad unhen hum sa ba-wafa na mila

gae hain dair-o-haram mein bhi barha lekin
wo aasra jo diya tu ne saqiya na mila

jo dur the to bahut parsa the ye zahid
jo pas aae to koi bhi parsa na mila

muqable ki jo taqat thi wo ubhar to saki
KHuda ka shukr hai kashti ko naKHuda na mila

jawab-e-jannat-e-rangin sahi teri duniya
magar hamein to yahan lutf ai KHuda na mila

hawa-o-hirs ke lakhon shikar pae magar
koi bhi dard mohabbat mein mubtala na mila

jo chashm-e-mast se chhalka ke de alast ki mai
tere siwa koi duniya mein saqiya na mila

mujhi ko baKHsh diye kul jahan ke aalam
gham-e-jahan ke liye koi dusra na mila

kahun to kis se kahun dil ki baat ai 'darshan'
sune jo dard-e-bashar aisa ham-nawa na mila

Source: Patta Patta