Subscribe to our newsletter and get our newest updates

Tafazzul Husain Khan Kaukab Dehlavi

  • Ghazal


miT gae hae makin aur makan-e-dehli


miT ga.e haa.e makīñ aur makān-e-dehlī
na rahā naam ko bhī nām-o-nishān-e-dehlī

sahme sahme na raheñ kyūñki muqīmān-e-falak
ki falak hai hadaf-e-tīr-e-fuġhān-e-dehlī

ham to insān haiñ jī kyūñki rahe bin ro.e
ki farishte bhī hue marsiya-ḳhvān-e-dehlī

jaise fāras meñ ḳhulāsa hai zabān-e-shīrāz
vaisī hī hind meñ hai paak zabān-e-dehlī

duur se dekh ke ho kyūñki yaqīñ dillī kā
aa ke dillī meñ ho jab yuuñ hī gumān-e-dehlī

fart-e-kāhīdgī-e-dard se yārab ab to
sab ke sab ho ga.e haiñ piir javān-e-dehlī

is kī vīrānī meñ ik baat hai dekho ab tak
miT ga.e par bhī to baaqī rahī ān-e-dehlī

jasad-e-charḳh na anjum se bane ābla-vār
gar na ho darpai barbādī-e-shān-e-dehlī

bas-ki hañgāma-talab thā ye vahāñ pahle se
fitna-e-hashr bhī hovegā miyān-e-dehlī

jo makīñ rah ga.e be-gor-o-kafan mar mar kar
Dhāñpne par vo gire un kā makān-e-dehlī

'ġhālib'-o-'sāqib'-o-'sālik' hī nahīñ haiñ ġhamgīñ
'kaukab'-e-ḳhasta bhī kartā hai fuġhān-e-dehlī

miT gae hae makin aur makan-e-dehli
na raha nam ko bhi nam-o-nishan-e-dehli

sahme sahme na rahen kyunki muqiman-e-falak
ki falak hai hadaf-e-tir-e-fughan-e-dehli

hum to insan hain ji kyunki rahe bin roe
ki farishte bhi hue marsiya-KHwan-e-dehli

jaise faras mein KHulasa hai zaban-e-shiraaz
waisi hi hind mein hai pak zaban-e-dehli

dur se dekh ke ho kyunki yaqin dilli ka
aa ke dilli mein ho jab yun hi guman-e-dehli

fart-e-kahidgi-e-dard se yarab ab to
sab ke sab ho gae hain pir jawan-e-dehli

is ki virani mein ek baat hai dekho ab tak
miT gae par bhi to baqi rahi aan-e-dehli

jasad-e-charKH na anjum se bane aabla-war
gar na ho darpai barbaadi-e-shan-e-dehli

bas-ki hangama-talab tha ye wahan pahle se
fitna-e-hashr bhi howega miyan-e-dehli

jo makin rah gae be-gor-o-kafan mar mar kar
Dhanpne par wo gire un ka makan-e-dehli

'ghaalib'-o-'saqib'-o-'salik' hi nahin hain ghamgin
'kaukab'-e-KHasta bhi karta hai fughan-e-dehli


Source: Book : Safeer-e-shar-e-dil (Pg. 493) Author : Hafeez Banarsi Publication : Hafeez Banarsi (2007) Edition : 2007

Leave a comment

+