hai vaj.h koī ḳhaas mirī aañkh jo nam hai
bas itnā samajhtā huuñ ki ye un kā karam hai

ye ishq kī me.arāj hai yā un kā karam hai
har vaqt mire sāmne tasvīr-e-sanam hai

ka.abe se ta.alluq hai na but-ḳhāne kā ġham hai
hāsil mire sajdoñ kā tirā naqsh-e-qadam hai

dīvānoñ pe kis darja tirā lutf-o-karam hai
baḳhshā hai jo ġham tū ne vahī hāsil-e-ġham hai

sar jab se jhukāyā hai dar-e-yār pe maiñ ne
mehrāb-e-ḳhudī jalva-gah-e-sham-e-haram hai

kyā kaam zamāne se use ai shah-e-ḳhūbāñ
taqdīr meñ jis kī tirī furqat kā alam hai

kaunain badal jaa.e magar tū na badalnā
tere hī sabab ahl-e-mohabbat kā bharam hai

palkoñ pe bikharte haiñ tirī yaad ke motī
har ashk-e-nadāmat tirā andāz-e-karam hai

zāhir meñ koī ka.aba koī dair-o-kalīsā
bātin meñ har ik chiiz tirā naqsh-e-qadam hai

kar apnī nazar se mire īmān kā saudā
ai dost tujhe merī mohabbat kī qasam hai

ye umr guzar jaa.e magar hosh na aa.e
sar shauq-e-ibādat meñ dar-e-yār pe ḳham hai

ai dost tire ishq meñ pahuñchā huuñ yahāñ tak
āñkhoñ meñ sanam-ḳhāna hai siine meñ haram hai

kis tarah 'fanā' chhoḌūñ sanam-ḳhāna-e-ulfat
hāsil mire īmān kā dīdār-e-sanam hai

duniyā se nirālī hai 'fanā' maqtal-e-ulfat
is maqtal-e-ulfat meñ jo sar hai vo qalam hai

hai wajh koi KHas meri aankh jo nam hai
bas itna samajhta hun ki ye un ka karam hai

ye ishq ki mearaj hai ya un ka karam hai
har waqt mere samne taswir-e-sanam hai

kabe se talluq hai na but-KHane ka gham hai
hasil mere sajdon ka tera naqsh-e-qadam hai

diwanon pe kis darja tera lutf-o-karam hai
baKHsha hai jo gham tu ne wahi hasil-e-gham hai

sar jab se jhukaya hai dar-e-yar pe main ne
mehrab-e-KHudi jalwa-gah-e-sham-e-haram hai

kya kaam zamane se use ai shah-e-KHuban
taqdir mein jis ki teri furqat ka alam hai

kaunain badal jae magar tu na badalna
tere hi sabab ahl-e-mohabbat ka bharam hai

palkon pe bikharte hain teri yaad ke moti
har ashk-e-nadamat tera andaz-e-karam hai

zahir mein koi kaba koi dair-o-kalisa
baatin mein har ek chiz tera naqsh-e-qadam hai

kar apni nazar se mere iman ka sauda
ai dost tujhe meri mohabbat ki qasam hai

ye umr guzar jae magar hosh na aae
sar shauq-e-ibaadat mein dar-e-yar pe KHam hai

ai dost tere ishq mein pahuncha hun yahan tak
aankhon mein sanam-KHana hai sine mein haram hai

kis tarah 'fana' chhoDun sanam-KHana-e-ulfat
hasil mere iman ka didar-e-sanam hai

duniya se nirali hai 'fana' maqtal-e-ulfat
is maqtal-e-ulfat mein jo sar hai wo qalam hai

Source: Deewan-e-Waleeullah Muhib