Subscribe to our newsletter and get our newest updates

Fani Badayuni

  • Ghazal

har ghaDi inqalab mein guzri


har ghaḌī inqalāb meñ guzrī
zindagī kis azaab meñ guzrī

shauq thā mānā-e-tajalli-e-dost
un kī shoḳhī hijāb meñ guzrī

karam-e-be-hisāb chāhā thā
sitam-e-be-hisāb meñ guzrī

varna dushvār thā sukūn-e-hayāt
ḳhair se iztirāb meñ guzrī

rāz-e-hastī kī justujū meñ rahe
raat tābīr-e-ḳhvāb meñ guzrī

kuchh kaTī himmat-e-savāl meñ umr
kuchh umīd-e-javāb meñ guzrī

kis ḳharābī se zindagī 'fānī'
is jahān-e-ḳharāb meñ guzrī

har ghaDi inqalab mein guzri
zindagi kis azab mein guzri

shauq tha mana-e-tajalli-e-dost
un ki shoKHi hijab mein guzri

karam-e-be-hisab chaha tha
sitam-e-be-hisab mein guzri

warna dushwar tha sukun-e-hayat
KHair se iztirab mein guzri

raaz-e-hasti ki justuju mein rahe
raat tabir-e-KHwab mein guzri

kuchh kaTi himmat-e-sawal mein umr
kuchh umid-e-jawab mein guzri

kis KHarabi se zindagi 'fani'
is jahan-e-KHarab mein guzri


Source: Book : TO MAIN KAHAN HOON (POETRY) (Pg. 16) Author : Badr Wasti Publication : Madhya Pradesh Urdu Academy (2010) Edition : 2010

Leave a comment

+