dekhnā har sub.h tujh ruḳhsār kā
hai mutāla matla-e-anvār kā

bulbul o parvāna karnā dil ke ta.iiñ
kaam hai tujh chehra-e-gul-nār kā

sub.h terā dars paayā thā sanam
shauq-e-dil mohtāj hai takrār kā

maah ke siine upar ai sham.a-rū
daaġh hai tujh husn kī jhalkār kā

dil kuuñ detā hai hamāre pech-o-tāb
pech tere turra-e-tarrār kā

jo sunyā tere dahan suuñ yak bachan
bhed paayā nusḳha-e-asrār kā

chāhtā hai is jahāñ meñ gar bahisht
jā tamāshā dekh us ruḳhsār kā

aarsī ke haath suuñ Dartā hai ḳhat
chor kuuñ hai ḳhauf chaukīdār kā

sar-kashī ātish-mizājī hai sabab
nāsehoñ ko garmi-e-bāzār kā

ai 'valī' kyuuñ sun sake nāseh kī baat
jo divānā hai parī-ruḳhsār kā

dekhna har subh tujh ruKHsar ka
hai mutala matla-e-anwar ka

bulbul o parwana karna dil ke tain
kaam hai tujh chehra-e-gul-nar ka

subh tera dars paya tha sanam
shauq-e-dil mohtaj hai takrar ka

mah ke sine upar ai shama-ru
dagh hai tujh husn ki jhalkar ka

dil kun deta hai hamare pech-o-tab
pech tere turra-e-tarrar ka

jo sunya tere dahan sun yak bachan
bhed paya nusKHa-e-asrar ka

chahta hai is jahan mein gar bahisht
ja tamasha dekh us ruKHsar ka

aarsi ke hath sun Darta hai KHat
chor kun hai KHauf chaukidar ka

sar-kashi aatish-mizaji hai sabab
nasehon ko garmi-e-bazar ka

ai 'wali' kyun sun sake naseh ki baat
jo diwana hai pari-ruKHsar ka

RECITATIONS Fasih Akmal



00:00/00:00 dekhna har subh tujh ruKHsar ka Fasih Akmal

Source: Qindeel