manzar shamshān ho gayā hai
dil qabristān ho gayā hai

ik saañs ke ba.ad dūsrī saañs
jiinā bhugtān ho gayā hai

chhū aa.e haiñ ham yaqīñ kī sarhad
jis vaqt gumān ho gayā hai

sargoshiyoñ kī dhamak hai har-sū
ġhul kānoñ-kān ho gayā hai

vo lamha huuñ maiñ ki ik zamāna
mere daurān ho gayā hai

sau nok-palak palak-jhapak meñ
uqda āsān ho gayā hai

manzil vo ḳham-e-safar hai jis par
chorī sāmān ho gayā hai

ik marhala-e-kashākash-e-fan
vaj.h-e-imkān ho gayā hai

kāġhaz pe qalam zarā jo phislā
iz.hār-e-bayān ho gayā hai

paidā hote hī aadmī ko
lāhaq nisyān ho gayā hai

piilī āñkhoñ meñ zard sapne
shab ko yarqān ho gayā hai

saude meñ ġhazal ke fā.eda 'sāz'
kaisā nuqsān ho gayā hai

manzar shamshan ho gaya hai
dil qabristan ho gaya hai

ek sans ke baad dusri sans
jina bhugtan ho gaya hai

chhu aae hain hum yaqin ki sarhad
jis waqt guman ho gaya hai

sargoshiyon ki dhamak hai har-su
ghul kanon-kan ho gaya hai

wo lamha hun main ki ek zamana
mere dauran ho gaya hai

sau nok-palak palak-jhapak mein
uqda aasan ho gaya hai

manzil wo KHam-e-safar hai jis par
chori saman ho gaya hai

ek marhala-e-kashakash-e-fan
wajh-e-imkan ho gaya hai

kaghaz pe qalam zara jo phisla
izhaar-e-bayan ho gaya hai

paida hote hi aadmi ko
lahaq nisyan ho gaya hai

pili aankhon mein zard sapne
shab ko yarqan ho gaya hai

saude mein ghazal ke faeda 'saz'
kaisa nuqsan ho gaya hai