us pe karnā mire nāloñ ne asar chhoḌ diyā
mujh ko ek lutf kī kar ke jo nazar chhoḌ diyā

sauñp kar ḳhāna-e-dil ġham ko kidhar jaate ho
phir na pāoge agar us ne ye ghar chhoḌ diyā

ashk-e-sozāñ ne jalā.e mire lākhoñ dāman
poñchhnā maiñ ne to ab dīda-e-tar chhoḌ diyā

baḳhiya-gar jal gayā kyā haath tirā sozish se
karte karte jo rafū chāk-e-jigar chhoḌ diyā

gulshan-e-dahr meñ ḳhāmī ne bachāyā ham ko
dekh kar ḳhaam kudūrat ne samar chhoḌ diyā

le ga.e sāmne hākim ke mire qātil ko
is ko us ne bhī samajh ḳhūn-e-pidar chhoḌ diyā

nek o bad kuchh nazar aatā nahīñ vo vahshat hai
parda ġhaflat kā mire pesh-e-nazar chhoḌ diyā

kūcha-e-zulf ko katrā ke gayā dil ruḳh par
us ne vo rasta-e-pur-ḳhauf-o-ḳhatar chhoḌ diyā

ai falak ḳhāna-ḳharābī kī hai parvā kis ko
dasht meñ rahte haiñ muddat huī ghar chhoḌ diyā

mujh pe ehsān sabā kā hai ki kūche meñ tire
ḳhaak ko merī sar-e-rāhguzar chhoḌ diyā

mujh ko ai aah ta.ajjub hai ki kāshāna-e-ġhair
kal shab-e-hijr ne barsā ke sharar chhoḌ diyā

bhar gayā dil mirā ek chiiz ko khāte khāte
ḳhūn-e-dil khā.eñge ab ḳhūn-e-jigar chhoḌ diyā

bojh se aap hī mar jā.egā kyuuñ ho badnām
ye samajh kar but-e-saffāk ne sar chhoḌ diyā

nahīñ tīr-e-nigah-e-yār se bachnā mumkin
kal hai maujūd vo din aaj agar chhoḌ diyā

aa gayā dil meñ jo aalam kā musaḳhḳhar karnā
zulf ko chehre pe hañgām-e-sahar chhoḌ diyā

ye nahīñ hai rah-e-but-ḳhāna kidhar jaanā hai
aaj se ham ne tirā saath ḳhizar chhoḌ diyā

kar diyā tīroñ se chhalnī mujhe saarā lekin
ḳhuun hone ke liye us ne jigar chhoḌ diyā

saath dekhā thā use kal to tere ai majnūñ
aaj us 'ārif'-e-vahshī ko kidhar chhoḌ diyā

us pe karna mere nalon ne asar chhoD diya
mujh ko ek lutf ki kar ke jo nazar chhoD diya

saunp kar KHana-e-dil gham ko kidhar jate ho
phir na paoge agar us ne ye ghar chhoD diya

ashk-e-sozan ne jalae mere lakhon daman
ponchhna main ne to ab dida-e-tar chhoD diya

baKHiya-gar jal gaya kya hath tera sozish se
karte karte jo rafu chaak-e-jigar chhoD diya

gulshan-e-dahr mein KHami ne bachaya hum ko
dekh kar KHam kudurat ne samar chhoD diya

le gae samne hakim ke mere qatil ko
is ko us ne bhi samajh KHun-e-pidar chhoD diya

nek o bad kuchh nazar aata nahin wo wahshat hai
parda ghaflat ka mere pesh-e-nazar chhoD diya

kucha-e-zulf ko katra ke gaya dil ruKH par
us ne wo rasta-e-pur-KHauf-o-KHatar chhoD diya

ai falak KHana-KHarabi ki hai parwa kis ko
dasht mein rahte hain muddat hui ghar chhoD diya

mujh pe ehsan saba ka hai ki kuche mein tere
KHak ko meri sar-e-rahguzar chhoD diya

mujh ko ai aah tajjub hai ki kashana-e-ghair
kal shab-e-hijr ne barsa ke sharar chhoD diya

bhar gaya dil mera ek chiz ko khate khate
KHun-e-dil khaenge ab KHun-e-jigar chhoD diya

bojh se aap hi mar jaega kyun ho badnam
ye samajh kar but-e-saffak ne sar chhoD diya

nahin tir-e-nigah-e-yar se bachna mumkin
kal hai maujud wo din aaj agar chhoD diya

aa gaya dil mein jo aalam ka musaKHKHar karna
zulf ko chehre pe hangam-e-sahar chhoD diya

ye nahin hai rah-e-but-KHana kidhar jaana hai
aaj se hum ne tera sath KHizar chhoD diya

kar diya tiron se chhalni mujhe sara lekin
KHun hone ke liye us ne jigar chhoD diya

sath dekha tha use kal to tere ai majnun
aaj us 'arif'-e-wahshi ko kidhar chhoD diya

Source: Book : Noquush (Pg. B-304 E-320) Publication : Nuqoosh Press Lahore (May June 1954) Edition : May June 1954