Subscribe to our newsletter and get our newest updates

Wajid Ali Shah Akhtar

  • Ghazal


barbaad na kar usko zara hath pe dhar la


barbād na kar us ko zarā haath pe dhar lā
ai bād-e-sabā ḳhāk-e-dar-e-yār idhar lā

sayyād se kyā fikr hai ai tā.ir-e-mazmūñ
kāġhaz ke tujhe par bhī lageñ kaam to kar lā

le jā dil-e-betāb nishānī mirī qāsid
sīmāb se hai martaba-e-ishq ḳhabar lā

ye kaan haiñ mushtāq-e-ḳhabar qāsid-e-jānāñ
āñkhoñ ko bhī dīdār hai manzūr-e-nazar lā

hasrat hai kahīñ hasrat-e-dil us kī nikāle
is 'aḳhtar'-e-ġhamgīñ ke liye dīda-e-tar lā

barbaad na kar us ko zara hath pe dhar la
ai baad-e-saba KHak-e-dar-e-yar idhar la

sayyaad se kya fikr hai ai tair-e-mazmun
kaghaz ke tujhe par bhi lagen kaam to kar la

le ja dil-e-betab nishani meri qasid
simab se hai martaba-e-ishq KHabar la

ye kan hain mushtaq-e-KHabar qasid-e-jaanan
aankhon ko bhi didar hai manzur-e-nazar la

hasrat hai kahin hasrat-e-dil us ki nikale
is 'aKHtar'-e-ghamgin ke liye dida-e-tar la


Source: Book : 1971 ki Muntakhab Shayri (Pg. 97) Author : Kumar Pashi, Prem Gopal Mittal Publication : P.K. Publishers, New Delhi (1972) Edition : 1972

Leave a comment

+