Subscribe to our newsletter and get our newest updates

Zafar Sahbai

  • Ghazal


be-hisi par hissiyat ki dastan likh dijiye


be-hisī par hissiyat kī dāstāñ likh dījiye
dhuup se ab barf par āb-e-ravāñ likh dījiye

kātib-e-taqdīr Thahre aap ko rokegā kaun
jo bhī ankur sar uThā.e rā.egāñ likh dījiye

aap kī āñkhoñ meñ chubh jā.egī varna raushnī
ham charāġhoñ ke muqaddar meñ dhuāñ likh dījiye

mushtahar ho jā.ūñgā firqa-parastī ke liye
merī peshānī pe aap urdu zabāñ likh dījiye

ham ġharīboñ se ri.āyat kī zarūrat hī nahīñ
sub.heñ dozaḳh haiñ to shāmoñ ko dhuāñ likh dījiye

aap to shāyad qasam hī khā chuke taḳhrīb kī
har jagah dhartī pe ab ātish-fishāñ likh dījiye

be-hisi par hissiyat ki dastan likh dijiye
dhup se ab barf par aab-e-rawan likh dijiye

katib-e-taqdir Thahre aap ko rokega kaun
jo bhi ankur sar uThae raegan likh dijiye

aap ki aankhon mein chubh jaegi warna raushni
hum charaghon ke muqaddar mein dhuan likh dijiye

mushtahar ho jaunga firqa-parasti ke liye
meri peshani pe aap urdu zaban likh dijiye

hum gharibon se riayat ki zarurat hi nahin
subhen dozaKH hain to shamon ko dhuan likh dijiye

aap to shayad qasam hi kha chuke taKHrib ki
har jagah dharti pe ab aatish-fishan likh dijiye


Source: Book : aatish zer pa (Pg. 35) Author : zafar sehbai Publication : zafar sehbai Bhopal (2009) Edition : 2009

Leave a comment

+