Subscribe to our newsletter and get our newest updates

Chand Akbarabadi

  • Ghazal


ek hawa aisi chali bagule bhi kale ho gae


ik havā aisī chalī bagule bhī kaale ho ga.e
chāñd ko sardī lagī sūraj ko chhāle ho ga.e

maz.habī ātish ne bachpan kī jalā dī dostī
ham bhī ka.aba ban ga.e tum bhī shivāle ho ga.e

hausla chhūne kā thā bachpan meñ tujh ko āsmāñ
barsoñ terī samt ik patthar uchhāle ho ga.e

hijr kī daulat ne mālā-māl mujh ko kar diyā
baal chāñdī ke hue sone ke chhāle ho ga.e

aire-ġhaire natthū-ḳhaire paḌh rahe haiñ chehre ab
chehre chehre na hue goyā risāle ho ga.e

daaġh sūraj kī hukūmat par bhī kuchh to lag gayā
kuchh ujāle jab añdheroñ ke nivāle ho ga.e

ā.inoñ par pattharoñ ke qatl kā ilzām kyuuñ
aa.ine ā.īne na hoñ jaise bhāle ho ga.e

dekh lete tum bhī apne is zamīñ ke 'chāñd' ko
itnī jaldī āsmāñ ke kyuuñ havāle ho ga.e

ek hawa aisi chali bagule bhi kale ho gae
chand ko sardi lagi suraj ko chhaale ho gae

mazhabi aatish ne bachpan ki jala di dosti
hum bhi kaba ban gae tum bhi shiwale ho gae

hausla chhune ka tha bachpan mein tujh ko aasman
barson teri samt ek patthar uchhaale ho gae

hijr ki daulat ne mala-mal mujh ko kar diya
baal chandi ke hue sone ke chhaale ho gae

aire-ghaire natthu-KHaire paDh rahe hain chehre ab
chehre chehre na hue goya risale ho gae

dagh suraj ki hukumat par bhi kuchh to lag gaya
kuchh ujale jab andheron ke niwale ho gae

aainon par pattharon ke qatl ka ilzam kyun
aaine aaine na hon jaise bhaale ho gae

dekh lete tum bhi apne is zamin ke 'chand' ko
itni jaldi aasman ke kyun hawale ho gae


Source: Mashal-e-raah

Leave a comment

+