Subscribe to our newsletter and get our newest updates

Mahshar Badayuni

  • Ghazal


hamare hath the suraj nae jahanon ke


hamāre haath the sūraj na.e jahānoñ ke
so ab zamīnoñ ke ham haiñ na āsmānoñ ke

hazār gird lagā leñ qad-āvar ā.īne
hasab-nasab bhī to hote haiñ ḳhāndānoñ ke

hurūf-bīñ to sabhī haiñ magar kise ye shu.ūr
kitāb paḌhtī hai chehre kitāb-ḳhvānoñ ke

ye kyā zarūr ki nāmoñ ke ham-mizāj hoñ log
bahār aur ḳhizāñ naam haiñ zamānoñ ke

vo chāhe aa ke na bāhar kisī se baat kareñ
ḳhabar makīnoñ kī dete haiñ dar makānoñ ke

hamārī qadr ko samjhe ye asr-e-nā-qadrāñ
ham ahl-e-fan haiñ khilaune nahīñ dukānoñ ke

ab aisī shorish-e-bāzār-e-mad.h meñ 'mahshar'
ḳhamosh lahje ġhanīmat haiñ qadr-dānoñ ke

hamare hath the suraj nae jahanon ke
so ab zaminon ke hum hain na aasmanon ke

hazar gird laga len qad-awar aaine
hasab-nasab bhi to hote hain KHandanon ke

huruf-bin to sabhi hain magar kise ye shuur
kitab paDhti hai chehre kitab-KHwanon ke

ye kya zarur ki namon ke ham-mizaj hon log
bahaar aur KHizan nam hain zamanon ke

wo chahe aa ke na bahar kisi se baat karen
KHabar makinon ki dete hain dar makanon ke

hamari qadr ko samjhe ye asr-e-na-qadran
hum ahl-e-fan hain khilaune nahin dukanon ke

ab aisi shorish-e-bazar-e-madh mein 'mahshar'
KHamosh lahje ghanimat hain qadr-danon ke


Leave a comment

+