Subscribe to our newsletter and get our newest updates

Mahshar Badayuni

  • Ghazal


kare dariya na pul mismar mere


kare dariyā na pul mismār mere
abhī kuchh log haiñ us paar mere

bahut din guzre ab dekh aa.uuñ ghar ko
kaheñge kyā dar-o-dīvār mere

vahīñ sūraj kī nazreñ thiiñ ziyāda
jahāñ the peḌ sāya-dār mere

vahī ye shahr hai to shahr vaalo
kahāñ haiñ kūcha-o-bāzār mere

tum apnā hāl-e-mahjūrī batāo
mujhe to khā ga.e āzār mere

jinheñ samjhā thā jāñ-parvar maiñ ab tak
vo sab nikle kafan-bardār mere

guzarte jā rahe haiñ din havā se
raheñ zinda-salāmat yaar mere

dabā jis se usī patthar meñ Dhal kar
bike chehre sar-e-bāzār mere

darīcha kyā khulā merī ġhazal kā
havā.eñ le uḌiiñ ash.ār mere

kare dariya na pul mismar mere
abhi kuchh log hain us par mere

bahut din guzre ab dekh aaun ghar ko
kahenge kya dar-o-diwar mere

wahin suraj ki nazren thin ziyaada
jahan the peD saya-dar mere

wahi ye shahr hai to shahr walo
kahan hain kucha-o-bazar mere

tum apna haal-e-mahjuri batao
mujhe to kha gae aazar mere

jinhen samjha tha jaan-parwar main ab tak
wo sab nikle kafan-bardar mere

guzarte ja rahe hain din hawa se
rahen zinda-salamat yar mere

daba jis se usi patthar mein Dhal kar
bike chehre sar-e-bazar mere

daricha kya khula meri ghazal ka
hawaen le uDin ashaar mere

Videos
This video is playing from YouTube Videos
This video is playing from YouTube Mahshar Badayuni Mahshar Badayuni

Source: Book : Kulliyat-e-Mahshar Badayuni (Pg. 202)

Leave a comment

+