ufuq se aag utar aa.ī hai mire ghar bhī
shikast hote haiñ kyā shahar apne andar bhī

ye āb-o-tāb isī marhale pe ḳhatm nahīñ
koī charāġh hai is aa.ine se bāhar bhī

ḳhamīr jis ne uThāyā hai ḳhaak se merā
usī ne ḳhvāb se khīñchā hai merā jauhar bhī

maiñ DhūñD lūñgā koī rāsta palaTne kā
jo band hogā kabhī mujh pe aap kā dar bhī

kisī ke aks-e-munavvar kī chhūT se hai dañg
to mere dam se hai ye ā.īna mukaddar bhī

ye saill-e-shab hī nahīñ mere vāste jaarī
ravāñ hai mere liye sub.h kā samundar bhī

dahakne vaale faqat phuul hī na the 'sājid'
khile hue the inhī kyāriyoñ meñ aḳhgar bhī

ufuq se aag utar aai hai mere ghar bhi
shikast hote hain kya shahar apne andar bhi

ye aab-o-tab isi marhale pe KHatm nahin
koi charagh hai is aaine se bahar bhi

KHamir jis ne uThaya hai KHak se mera
usi ne KHwab se khincha hai mera jauhar bhi

main DhunD lunga koi rasta palaTne ka
jo band hoga kabhi mujh pe aap ka dar bhi

kisi ke aks-e-munawwar ki chhuT se hai dang
to mere dam se hai ye aaina mukaddar bhi

ye saill-e-shab hi nahin mere waste jari
rawan hai mere liye subh ka samundar bhi

dahakne wale faqat phul hi na the 'sajid'
khile hue the inhi kyariyon mein aKHgar bhi