chāhe tan man sab jal jaa.e
soz-e-darūñ par aañch na aa.e

shīsha TuuTe ġhul mach jaa.e
dil TuuTe āvāz na aa.e

bahr-e-mohabbat tauba! tauba!
tairā jaa.e na Duubā jaa.e

ai vaa.e majbūrī-e-insāñ
kyā soche aur kyā ho jaa.e

haa.e vo naġhma jis kā muġhannī
gaatā jaa.e rotā jaa.e

izzat daulat ānī-jānī
mil mil jaa.e chhin chhin jaa.e

jis ko kahnī dil kī kahānī
sar-tā-pā dhaḌkan ban jaa.e

mai-ḳhāne kī samt na dekho
jaane kaun nazar aa jaa.e

kaash hamārā farz-e-mohabbat
aish-e-mohabbat par chhā jaa.e

chahe tan man sab jal jae
soz-e-darun par aanch na aae

shisha TuTe ghul mach jae
dil TuTe aawaz na aae

bahr-e-mohabbat tauba! tauba!
taira jae na Duba jae

ai wae majburi-e-insan
kya soche aur kya ho jae

hae wo naghma jis ka mughanni
gata jae rota jae

izzat daulat aani-jaani
mil mil jae chhin chhin jae

jis ko kahni dil ki kahani
sar-ta-pa dhaDkan ban jae

mai-KHane ki samt na dekho
jaane kaun nazar aa jae

kash hamara farz-e-mohabbat
aish-e-mohabbat par chha jae