kisī ko zahr dūñgā aur kisī ko jaam dūñgā
maiñ apne jāñ-nisāroñ ko yahī in.aam dūñgā

añdhere meñ damak uThte haiñ jitne bhī sitāre
agar fursat milī to maiñ unheñ kuchh naam dūñgā

kisī tārīk miTTī par mujhe bhī saath rakhnā
ki maiñ tujh ko kisī mushkil ghaḌī meñ kaam dūñgā

thakā-hārā huuñ tanhā huuñ magar ye baat tai hai
maiñ tohfe meñ tujhe ik roz mulk-e-shām dūñgā

dukān-e-aslaha se maiñ ne jo shamshīr lī hai
maiñ us ke daam pūchhūñgā na us ke.... daam dūñgā

mujhe har roz kahtā hai ye baat ab merā beTā
tujhe maiñ is buḌhāpe meñ bahut ārām dūñgā

kisi ko zahr dunga aur kisi ko jam dunga
main apne jaan-nisaron ko yahi inam dunga

andhere mein damak uThte hain jitne bhi sitare
agar fursat mili to main unhen kuchh nam dunga

kisi tarik miTTi par mujhe bhi sath rakhna
ki main tujh ko kisi mushkil ghaDi mein kaam dunga

thaka-haara hun tanha hun magar ye baat tai hai
main tohfe mein tujhe ek roz mulk-e-sham dunga

dukan-e-aslaha se main ne jo shamshir li hai
main us ke dam puchhunga na us ke dam dunga

mujhe har roz kahta hai ye baat ab mera beTa
tujhe main is buDhape mein bahut aaram dunga