Subscribe to our newsletter and get our newest updates

Jamal Ehsani

  • Ghazal


umr guzri jis ka rasta dekhte


umr guzrī jis kā rasta dekhte
aa bhī jaatā vo to ham kyā dekhte

kaise kaise moḌ aa.e raah meñ
saath chalte to tamāshā dekhte

qarya-qarya jitnā āvāra phire
ghar meñ rah lete to duniyā dekhte

gar bahā aate na dariyāoñ meñ ham
aaj un āñkhoñ se sahrā dekhte

ḳhud hī rakh aate diyā dīvār par
aur phir us kā bhaḌaknā dekhte

jab huī ta.amīr jism o jaañ to log
haath kā miTTī meñ khonā dekhte

do qadam chal aate us ke saath saath
jis musāfir ko akelā dekhte

e'tibār uTh jaatā aapas kā 'jamāl'
log agar us kā bichhaḌnā dekhte

umr guzri jis ka rasta dekhte
aa bhi jata wo to hum kya dekhte

kaise kaise moD aae rah mein
sath chalte to tamasha dekhte

qarya-qarya jitna aawara phire
ghar mein rah lete to duniya dekhte

gar baha aate na dariyaon mein hum
aaj un aankhon se sahra dekhte

KHud hi rakh aate diya diwar par
aur phir us ka bhaDakna dekhte

jab hui tamir jism o jaan to log
hath ka miTTi mein khona dekhte

do qadam chal aate us ke sath sath
jis musafir ko akela dekhte

e'tibar uTh jata aapas ka 'jamal'
log agar us ka bichhaDna dekhte


Leave a comment

+