Subscribe to our newsletter and get our newest updates

JaiKrishn Chaudhri Habeeb

  • Ghazal


tujhe apni fazaon par pasheman kaun dekhega


tujhe apnī fazāoñ par pashemāñ kaun dekhegā
tirā ġham sah ke bhī tujh ko pareshāñ kaun dekhegā

na aa.eñ vo nazar andar to bāhar kī taraf dekhūñ
tasavvur hai to phir tasvīr-e-jānāñ kaun dekhegā

kisī ke nuur kī jab dīda-o-dil meñ tajallī hai
to phir bazm-e-jahāñ ke ab charāġhāñ kaun dekhegā

sunegā kaun is shor-e-jahāñ meñ dhaḌkaneñ dil kī
mirā bhīgā huā ashkoñ se dāmāñ kaun dekhegā

jahāñ sub.h-e-vatan jaatī hai rañg-o-nūr barsātī
vahāñ be-kaif sī shām-e-ġharībāñ kaun dekhegā

tire dar par jamī hai har pareshāñ-hāl kī nazreñ
na tū dekhe to phir hāl-e-pareshāñ kaun dekhegā

jahāñ ne sirf ye dekhā ki sāhil par salāmat huuñ
uThā hai jo mire siine meñ tūfāñ kaun dekhegā

'habīb' āñkhoñ ko apnī band kar ke hī chaleñ varna
sar-e-bāzār biktā ḳhūn-e-insāñ kaun dekhegā

tujhe apni fazaon par pasheman kaun dekhega
tera gham sah ke bhi tujh ko pareshan kaun dekhega

na aaen wo nazar andar to bahar ki taraf dekhun
tasawwur hai to phir taswir-e-jaanan kaun dekhega

kisi ke nur ki jab dida-o-dil mein tajalli hai
to phir bazm-e-jahan ke ab charaghan kaun dekhega

sunega kaun is shor-e-jahan mein dhaDkanen dil ki
mera bhiga hua ashkon se daman kaun dekhega

jahan subh-e-watan jati hai rang-o-nur barsati
wahan be-kaif si sham-e-ghariban kaun dekhega

tere dar par jami hai har pareshan-haal ki nazren
na tu dekhe to phir haal-e-pareshan kaun dekhega

jahan ne sirf ye dekha ki sahil par salamat hun
uTha hai jo mere sine mein tufan kaun dekhega

'habib' aankhon ko apni band kar ke hi chalen warna
sar-e-bazar bikta KHun-e-insan kaun dekhega


Leave a comment

+