Subscribe to our newsletter and get our newest updates

Aamir Suhail

  • Ghazal


kahaniyon ne zara khinch kar badan apne


kahāniyoñ ne zarā khīñch kar badan apne
haram-sarā se bulāyā hameñ vatan apne

khule gale kī qamīseñ khule gale ke firāq
ye laḌkiyāñ haiñ badaltī haiñ pairahan apne

ġhadar ke phuul sajātī haiñ aise bāloñ meñ
sambhāl saktī hoñ jaise bhare badan apne

ajab bhaḌak hai sharāboñ kī aur āñkhoñ kī
balā hai husn bidakne lage haiñ ban apne

parā.e dard kī Thikrī se ghar kareñ raushan
ki siflagī kī riyāzat meñ haiñ magan apne

ye inkisār ke putle ye sīm-o-zar kī sanā
ye masḳhare haiñ ki chole meñ gorkan apne

hameñ nikālo gharoñ kī kamīn gāhoñ se
lahū ke ram se dahakne lage ḳhutan apne

ham ehtiyāj ke hujroñ se rizq chunte hue
zamīñ ke ḳhvān pe rakhne lage lagan apne

ye ārzūoñ ke chaqmāq se jale siine
jo ātishīñ haiñ magar nochte haiñ tan apne

yahāñ zamīn pe balve yahāñ zamīñ pe fasād
nikāl rakhte haiñ sandūq se kafan apne

vo baas duur ke ḳhatoñ kī auratoñ meñ uḌī
jise jahāzoñ meñ laa.e the ham-suḳhan apne

kahaniyon ne zara khinch kar badan apne
haram-sara se bulaya hamein watan apne

khule gale ki qamisen khule gale ke firaq
ye laDkiyan hain badalti hain pairahan apne

ghadar ke phul sajati hain aise baalon mein
sambhaal sakti hon jaise bhare badan apne

ajab bhaDak hai sharabon ki aur aankhon ki
bala hai husn bidakne lage hain ban apne

parae dard ki Thikri se ghar karen raushan
ki siflagi ki riyazat mein hain magan apne

ye inkisar ke putle ye sim-o-zar ki sana
ye masKHare hain ki chole mein gorkan apne

hamein nikalo gharon ki kamin gahon se
lahu ke ram se dahakne lage KHutan apne

hum ehtiyaj ke hujron se rizq chunte hue
zamin ke KHwan pe rakhne lage lagan apne

ye aarzuon ke chaqmaq se jale sine
jo aatishin hain magar nochte hain tan apne

yahan zamin pe balwe yahan zamin pe fasad
nikal rakhte hain sanduq se kafan apne

wo bas dur ke KHaton ki auraton mein uDi
jise jahazon mein lae the ham-suKHan apne


Source: Deewan-e-Bahram

Leave a comment

+