terī āñkheñ na rahīñ ā.īna-ḳhāna mire dost
kitnī tezī se badaltā hai zamāna mire dost

jaane kis kaam meñ masrūf rahā barsoñ tak
yaad aayā hī nahīñ tujh ko bhulānā mire dost

pūchhnā mat ki ye kyā haal banā rakkhā hai
ā.īna ban ke mirā dil na dukhānā mire dost

is mulāqāt meñ jo ġhair-zarūrī ho jaa.e
yaad rahtā hai kise haath milānā mire dost

dekhnā mujh ko magar merī pazīrā.ī ko
apnī āñkhoñ meñ sitāre na sajānā mire dost

ab vo titlī hai na vo umr ta.āqub vaalī
maiñ na kahtā thā bahut duur na jaanā mare dost

hijr taqdīr meñ likkhā thā ki majbūrī thī
chhoḌ is baat se kyā milnā milānā mire dost

tū ne ehsān kiyā apnā banā kar mujh ko
varna maiñ kyā thā haqīqat na fasāna mire dost

is kahānī meñ kise kaun kahāñ chhoḌ gayā
yaad aa jaa.e to mujh ko bhī batānā mire dost

chhoḌ aayā huuñ havāoñ kī nigahbānī meñ
vo samundar vo jazīra vo ḳhazāna mire dost

aise rastoñ pe jo aapas meñ kahīñ milte hoñ
kyuuñ na us moḌ se ho jaa.eñ ravāna mire dost

teri aankhen na rahin aaina-KHana mere dost
kitni tezi se badalta hai zamana mere dost

jaane kis kaam mein masruf raha barson tak
yaad aaya hi nahin tujh ko bhulana mere dost

puchhna mat ki ye kya haal bana rakkha hai
aaina ban ke mera dil na dukhana mere dost

is mulaqat mein jo ghair-zaruri ho jae
yaad rahta hai kise hath milana mere dost

dekhna mujh ko magar meri pazirai ko
apni aankhon mein sitare na sajaana mere dost

ab wo titli hai na wo umr taaqub wali
main na kahta tha bahut dur na jaana mare dost

hijr taqdir mein likkha tha ki majburi thi
chhoD is baat se kya milna milana mere dost

tu ne ehsan kiya apna bana kar mujh ko
warna main kya tha haqiqat na fasana mere dost

is kahani mein kise kaun kahan chhoD gaya
yaad aa jae to mujh ko bhi batana mere dost

chhoD aaya hun hawaon ki nigahbani mein
wo samundar wo jazira wo KHazana mere dost

aise raston pe jo aapas mein kahin milte hon
kyun na us moD se ho jaen rawana mere dost