gul tire mukh kī fikr meñ bīmār
jiiv bulbul kā tujh qadam pe nisār

gul kuuñ ai shoḳh mukh tanik dikhlā
ki ḳhizāñ kar dikhā de us kuuñ bahār

mast se dil kuuñ hai hazar lāzim
nain tere bahut hue sarshār

is galī meñ qadam karam suuñ dhar
ki karūñ har qadam pe jiiv nisār

mārtī mujh kuuñ ai kamāñ abrū
ye palak tiir o ye nigah talvār

hijr meñ tere aah kartā hai
dil-e-āshiq nahīñ hai Tuk bekār

kyā kare tujh se paapī suuñ 'fā.ez'
siina ġham suuñ hai tere ābla-dār

gul tere mukh ki fikr mein bimar
jiw bulbul ka tujh qadam pe nisar

gul kun ai shoKH mukh tanik dikhla
ki KHizan kar dikha de us kun bahaar

mast se dil kun hai hazar lazim
nain tere bahut hue sarshaar

is gali mein qadam karam sun dhar
ki karun har qadam pe jiw nisar

marti mujh kun ai kaman abru
ye palak tir o ye nigah talwar

hijr mein tere aah karta hai
dil-e-ashiq nahin hai Tuk bekar

kya kare tujh se papi sun 'faez'
sina gham sun hai tere aabla-dar

Source: Book : Khayaabaan (Pg. 141) Author : Hassan Abbas Raza Publication : Bazm-e-Khayaabaan-e-adab, Pakistan