Subscribe to our newsletter and get our newest updates

Wakil Akhtar

  • Ghazal


bujha bhi jae koi aa ke aandhiyon ki tarah


bujhā bhī jaa.e koī aa ke āñdhiyoñ kī tarah
ki jal rahā huuñ ka.ī yug se maiñ diyoñ kī tarah

vo dostoñ kī tarah hai na dushmanoñ kī tarah
maiñ jis ko dekh ke hairāñ huuñ ā.īnoñ kī tarah

maiñ us ko dekh to saktā huuñ chhū nahīñ saktā
vo mere paas bhī hotā hai fāsloñ kī tarah

vo aa bhī jaa.e to us ko kahāñ biThā.ūñgā
maiñ apne ghar meñ to rahtā huuñ be-gharoñ kī tarah

na jaane raat ga.e kis kī nuqra.ī āvāz
khanaktī hai mere kānoñ meñ chūḌiyoñ kī tarah

bujha bhi jae koi aa ke aandhiyon ki tarah
ki jal raha hun kai yug se main diyon ki tarah

wo doston ki tarah hai na dushmanon ki tarah
main jis ko dekh ke hairan hun aainon ki tarah

main us ko dekh to sakta hun chhu nahin sakta
wo mere pas bhi hota hai faslon ki tarah

wo aa bhi jae to us ko kahan biThaunga
main apne ghar mein to rahta hun be-gharon ki tarah

na jaane raat gae kis ki nuqrai aawaz
khanakti hai mere kanon mein chuDiyon ki tarah


Source: Book : Pakistani Adab (Pg. 497) Author : Dr. Rashid Amjad Publication : Pakistan Academy of Letters, Islambad, Pakistan (2009) Edition : 2009

Leave a comment

+