Subscribe to our newsletter and get our newest updates

Liyaqat Ali Aasim

  • Ghazal


kahin aisa na ho daman jala lo


kahīñ aisā na ho dāman jalā lo
hamāre āñsuoñ par ḳhaak Daalo

manānā hī zarūrī hai to phir tum
hameñ sab se ḳhafā ho kar manā lo

bahut roī huī lagtī haiñ āñkheñ
mirī ḳhātir zarā kājal lagā lo

akele-pan se ḳhauf aatā hai mujh ko
kahāñ ho ai mire ḳhvābo ḳhayālo

bahut māyūs baiThā huuñ maiñ tum se
kabhī aa kar mujhe hairat meñ Daalo

kahin aisa na ho daman jala lo
hamare aansuon par KHak Dalo

manana hi zaruri hai to phir tum
hamein sab se KHafa ho kar mana lo

bahut roi hui lagti hain aankhen
meri KHatir zara kajal laga lo

akele-pan se KHauf aata hai mujh ko
kahan ho ai mere KHwabo KHayalo

bahut mayus baiTha hun main tum se
kabhi aa kar mujhe hairat mein Dalo


Source: Shab Khoon(Shumara Number-064)

Leave a comment

+