kabhī kabhī koī chehra ye kaam kartā hai
mire badan meñ lahū tez-gām kartā hai

har ek lafz ko māh-e-tamām kartā hai
mirī zabān se jab vo kalām kartā hai

ka.ī dinoñ ke safar se maiñ jab palaTtā huuñ
vo apne puure badan se kalām kartā hai

bahut aziiz haiñ us ko bhī chhuTTiyāñ merī
vo roz koī nayā ehtimām kartā hai

shikāyatoñ kī adā bhī baḌī nirālī hai
vo jab bhī miltā hai jhuk kar salām kartā hai

maiñ mushtahar huuñ sitamgar kī mehrbānī se
vo apne saare sitam mere naam kartā hai

kisī ke haath meñ ḳhanjar kisī ke haath meñ phuul
qalam hai ek magar kitne kaam kartā hai

jab us se miltā huuñ daftar ko bhuul jaatā huuñ
'zafar' vo bātoñ hī bātoñ meñ shaam kartā hai

kabhi kabhi koi chehra ye kaam karta hai
mere badan mein lahu tez-gam karta hai

har ek lafz ko mah-e-tamam karta hai
meri zaban se jab wo kalam karta hai

kai dinon ke safar se main jab palaTta hun
wo apne pure badan se kalam karta hai

bahut aziz hain us ko bhi chhuTTiyan meri
wo roz koi naya ehtimam karta hai

shikayaton ki ada bhi baDi nirali hai
wo jab bhi milta hai jhuk kar salam karta hai

main mushtahar hun sitamgar ki mehrbani se
wo apne sare sitam mere nam karta hai

kisi ke hath mein KHanjar kisi ke hath mein phul
qalam hai ek magar kitne kaam karta hai

jab us se milta hun daftar ko bhul jata hun
'zafar' wo baaton hi baaton mein sham karta hai