Subscribe to our newsletter and get our newest updates

Tabish Dehlvi

  • Ghazal


sharminda hum junun se hain ek ek tar ke


sharminda ham junūñ se haiñ ek ek taar ke
kyā kījiye ki din haiñ abhī tak bahār ke

ai umr-e-shauq dekhiye miltā hai kyā javāb
ham ne kisī kā naam liyā hai pukār ke

sar-gashta-e-alam ho ki shorīda-sar koī
ehsāñ haiñ ahl-e-shauq pe dīvār-e-yār ke

allāh re intizār-e-bahārāñ kī lazzateñ
guzrī hai yuuñ ḳhizāñ bhī ki din hoñ bahār ke

'tābish' sukūn-e-dard se taskīn-e-marg tak
dil ho agar to laakh haiñ pahlū qarār ke

sharminda hum junun se hain ek ek tar ke
kya kijiye ki din hain abhi tak bahaar ke

ai umr-e-shauq dekhiye milta hai kya jawab
hum ne kisi ka nam liya hai pukar ke

sar-gashta-e-alam ho ki shorida-sar koi
ehsan hain ahl-e-shauq pe diwar-e-yar ke

allah re intizar-e-bahaaran ki lazzaten
guzri hai yun KHizan bhi ki din hon bahaar ke

'tabish' sukun-e-dard se taskin-e-marg tak
dil ho agar to lakh hain pahlu qarar ke


Leave a comment

+