Subscribe to our newsletter and get our newest updates

Kaleem Aajiz

  • Ghazal


talKHiyan isMein bahut kuchh hain maza kuchh bhi nahin


talḳhiyāñ is meñ bahut kuchh haiñ mazā kuchh bhī nahīñ
zindagī dard-e-mohabbat ke sivā kuchh bhī nahīñ

sham.a ḳhāmosh bhī rahte hue ḳhāmosh kahāñ
is tarah kah diyā sab kuchh ki kahā kuchh bhī nahīñ

ham gadāyān-e-mohabbat kā yahī sab kuchh hai
garche duniyā yahī kahtī hai vafā kuchh bhī nahīñ

ye nayā tarz-e-karam hai tirā ai fasl-e-bahār
le liyā paas meñ jo kuchh thā diyā kuchh bhī nahīñ

ham ko ma.alūm na thā pahle ye ā.īn-e-jahāñ
us ko dete haiñ sazā jis kī ḳhatā kuchh bhī nahīñ

vahī aaheñ vahī aañsū ke do qatre 'ājiz'
kyā tirī shā.irī meñ in ke sivā kuchh bhī nahīñ

talKHiyan is mein bahut kuchh hain maza kuchh bhi nahin
zindagi dard-e-mohabbat ke siwa kuchh bhi nahin

shama KHamosh bhi rahte hue KHamosh kahan
is tarah kah diya sab kuchh ki kaha kuchh bhi nahin

hum gadayan-e-mohabbat ka yahi sab kuchh hai
garche duniya yahi kahti hai wafa kuchh bhi nahin

ye naya tarz-e-karam hai tera ai fasl-e-bahaar
le liya pas mein jo kuchh tha diya kuchh bhi nahin

hum ko malum na tha pahle ye aain-e-jahan
us ko dete hain saza jis ki KHata kuchh bhi nahin

wahi aahen wahi aansu ke do qatre 'ajiz'
kya teri shairi mein in ke siwa kuchh bhi nahin


Leave a comment

+