haath meñ hai ik purānī Diary
kholne baiThā huuñ girheñ yaad kī

us se va.ada hai mileñge shaam ko
shaam kitnī der ke baad aa.egī

ham ne sochā thā chaleñge sair ko
rāstoñ ne phir safedī oḌh lī

garm kamroñ se nikaltā kaun hai
mahfileñ ujḌī huī haiñ shahr kī

chubh rahī hai merī āñkhoñ meñ bahut
chār-sū phailī huī be-manzarī

pyaar kī ḳhushbū se ḳhālī nisbateñ
rābte sab dil ke rañgoñ se tahī

ik ta.alluq bante bante rah gayā
khilte khilte ik kalī murjhā ga.ī

hath mein hai ek purani Diary
kholne baiTha hun girhen yaad ki

us se wada hai milenge sham ko
sham kitni der ke baad aaegi

hum ne socha tha chalenge sair ko
raston ne phir safedi oDh li

garm kamron se nikalta kaun hai
mahfilen ujDi hui hain shahr ki

chubh rahi hai meri aankhon mein bahut
chaar-su phaili hui be-manzari

pyar ki KHushbu se KHali nisbaten
rabte sab dil ke rangon se tahi

ek talluq bante bante rah gaya
khilte khilte ek kali murjha gai