us ke partav se huā hai zāfrānī rañg kā
ā.īna to aaj bhī hai kahkashānī rañg kā

hijr ke bādal chhaTe to vasl kī taqvīm meñ
dil huvaidā ho rahā hai gulsitānī rañg kā

pairahan us kā hai aisā yā jhalaktā hai badan
ik parī-vash raqs meñ hai urġhuvānī rañg kā

aaj kī shab ḳhaas hogī jab sunā.ūñgā use
ek qissa apnā zaatī dāstānī rañg kā

dostoñ kī mehrbānī se huā ye kaam bhī
maiñ ne dekhā hī nahīñ thā ḳhuun paanī rañg kā

gar diloñ se yuuñ dhuāñ uThtā rahegā raat din
āsmāñ kaise bachegā āsmānī rañg kā

haañ usī ne phuul Tāñke hoñge in ashjār par
jis ne miTTī ko diyā hai jubba dhānī rañg kā

us ke partaw se hua hai zafrani rang ka
aaina to aaj bhi hai kahkashani rang ka

hijr ke baadal chhaTe to wasl ki taqwim mein
dil huwaida ho raha hai gulsitani rang ka

pairahan us ka hai aisa ya jhalakta hai badan
ek pari-wash raqs mein hai urghuwani rang ka

aaj ki shab KHas hogi jab sunaunga use
ek qissa apna zati dastani rang ka

doston ki mehrbani se hua ye kaam bhi
main ne dekha hi nahin tha KHun pani rang ka

gar dilon se yun dhuan uThta rahega raat din
aasman kaise bachega aasmani rang ka

han usi ne phul Tanke honge in ashjar par
jis ne miTTi ko diya hai jubba dhani rang ka

Videos
This video is playing from YouTube Videos
This video is playing from YouTube Obaid Siddiqi RECITATIONS Obaid Siddiqi



00:00/00:00 uske partaw se hua hai zafrani rang ka Obaid Siddiqi